Fjordane friluftsråd inviterar til to friluftsskular i Stryn i sommar!

Friluftsskulen er eit dagstilbod for barn og unge i kommunen som ønskjer å oppleve naturen på ein aktiv, trygg og lærerik måte. Aktivitetane vert gjennomførte i ulike naturmiljø, tilpassa dei lokale moglegheitene i kvar kommune. Målet er å gje deltakarane gode naturopplevingar, styrkje interessa for friluftsliv og skape meistring gjennom leik, aktivitet og fellesskap.

Gjennom friluftsskulen får deltakarane ei positiv innføring i friluftsliv, der det viktigaste er å ha det kjekt saman ute. Aktivitetane legg til rette for utforsking, samarbeid og læring gjennom praktiske erfaringar.

Gjennomføring

Friluftsskulen går over tre dagar:

• Dag 1: kl. 09.00–15.00
• Dag 2: oppstart kl. 09.00, med overnatting til dag 3
• Dag 3: avslutning kl. 15.00

Det er frivillig å overnatte. Føresette er hjarteleg velkomne til å delta på overnattinga dersom dei ønskjer det.

Friluftsskulen har plass til om lag 20 deltakarar. Det meste av undervisninga og aktivitetane vil gå føre seg samla, men ved enkelte aktivitetar kan deltakarane bli delte inn i mindre grupper.

Tilpassa natur og vêr

Vestlandsvêret kan vere skiftande, og både vind og nedbør må reknast med. Enkelte aktivitetar, særleg dei som involverer båt eller kajakk ved kysten, er avhengige av gode og trygge vêrforhold.

Programmet er difor fleksibelt, og det kan bli gjort endringar undervegs dersom vêret eller andre forhold gjer det nødvendig. Vi har alltid alternative aktivitetar og løysingar som sikrar gode opplevingar og trygg gjennomføring for alle deltakarar.

Praktisk informasjon og påmelding her!