Bli med på vårryddedagen 21. mars

Når snøen smeltar og våren nærmar seg, kjem også mykje av søppelet som har lege skjult gjennom vinteren til syne. Laurdag 21. mars 2026 oppmodar Naturvernforbundet folk over heile landet til å bli med på vårryddedagen – ein dugnad for naturen før fuglane kjem tilbake til hekkeplassane sine. Naturvernforbundet sine lokal- og fylkeslag har halde på med strandrydding i over 50 år. Laga ryddar langs elvar, innsjøar, vassdrag og strender – og elles i naturen – gjennom heile året og over heile landet. 

Vårryddedagen er ein enkel og konkret måte å ta vare på naturen rundt oss på. Plast, emballasje og anna avfall som ligg i naturen kan vere farleg for både fuglar og dyr. Ved å rydde tidleg på våren kan vi fjerne søppel før dyrelivet tek områda i bruk igjen.

Naturvernforbundet oppmodar både enkeltpersonar, familiar, lag, skular og barnehagar til å delta. Ein treng ikkje organisere store arrangement – det kan vere like enkelt som å ta med ein pose på tur og plukke søppel langs vegen, ved stranda eller i nærmiljøet. Etter en ryddeaksjon kan du registrere søppelet du har plukket i folkeforskningsportalen Rydde: https://ryddenorge.no/. 

Sjølv om den nasjonale vårryddedagen er 21. mars, er bodskapen klar: Dersom datoen ikkje passar, kan ein like gjerne rydde ein annan dag. Det viktigaste er at vi bidreg før hekkesesongen startar.